யுவனுடன்

காலம் உன்னை உயிரோடு வைத்திருக்கிறதென்றால் உனக்காக ஏதோ ஓர் அதிசயத்தை ஒளித்துவைத்திருக்கும். 

22-12-2022, வியாழன், மாலை 5 மணி

வெறுமனே நடைபயிற்சி சென்று கொண்டிருக்கும் யுவனின்(இளைஞனின்) எதிரில் யுவன் சந்திரசேகர் என்ற ஆதர்ச எழுத்தாளர் எதிர்கொண்டழைத்தால் எப்படியிருக்கும். இரண்டுமணி நேரமளவிற்கு ஜே கிருஷ்ணமூர்த்தியிலிருந்து, தாய் மார்க்ஸிம் கார்க்கி வரை அநேக புள்ளிகள் தொட்டுச் சென்றார். master class என்னும் பதம் இப்போது பிரபலமாகி வருகிறது, மணி ரத்னம் அவர்கள் சினிமா கற்று தருவதுபோல், மெஸ்ஸி கால்பந்து ஆட கற்றுத்தருவதுபோல், மாஸ்டர்கள் தங்கள் துறை பற்றி கத்துக் குட்டிகளுக்கு கற்றுத் தருவது. அப்படியான ஒரு சந்திப்பு இன்று மாலை நிகழ்ந்தது.

நன்றி - தமிழ் விக்கி 

இரண்டாம் சுற்றின் போது தூறிய தூறல்கள் நாங்கள் பேசியதை ஒட்டுக் கேட்டிருக்கக் கூடும். தான் எழுதிய அற்புதமான வரிகள் சிலவற்றை தான் தான் எழுதினோமா என்று என்னக்கூடுமென்றும் பின்னொரு நாள் அது தன்னை போன்ற ஒரு படைப்பாளன் முன்பே கண்டறிந்த ஒரு உச்சம், அது இருவருக்குமானது அல்ல. இப் பிரபஞ்சத்திற்கானது என்றார் . நிழல் பிதுங்கி வழிந்த என்ற வரி எழுதிவிட்டு நல்ல இருக்கு ல? என்றார். பின் the shadow is squeezed என்று ஒரு ஆங்கில நாவலில் ஏறத்தாழ அதே உவமையை கண்டதைச்  சொன்னார். 

மணற்கேணி 

மூன்று சுற்று காலனியை சுற்றி நடந்துவிட்டு, வீட்டிற்கு அழைத்து காப்பியும் கொடுத்து கற்றுத் தந்தார். ஒளிவிலகல் மற்றும் மணற்கேணி ஆகிய அவரது நூல்களை கையொப்பமிட்டு பரிசாகத் தந்தார். சுந்தர ராமசாமியுடன் நடந்த உரையாடலை சொன்னதால் எவ்வளவு பணம் தரவேண்டும் என்று நன் கேட்க விரும்பவில்லை. பின் வரலாற்றின் மீது ஒரு ஒவ்வாமை ஏன் வருகிறதென விளக்கினார். "என் தாத்தா ஜோசியக் காரர்" என்ற பதம் உனக்கும் எனக்கும் எவ்வகையிலேனும் பயனளிக்கவில்லையாயின் எதற்கு அதை குறித்துவைத்துக் கொண்டு ?

ஒளிவிலகல் புத்தகம் 

சிராப்பள்ளி நாவலின் ஆசையை அவரிடம் பகிர்ந்து கொண்டேன். தரவுகள் சேகரிப்பது ஒருபுறம் இருக்கட்டும் நாம் எழுதப் போவது மானுடத்தை பற்றி அதில் தரவுகள் புள்ளியை எப்போது வேண்டுமென்றாலும் செருகிக் கொள்ளலாம், எழுதுவதை இப்போதே தொடங்கிவிடுங்கள் என்றார். 

அறம் தொகுதியை குறித்த அவரது மாற்றுக் கருத்துக்களை பகிர்ந்துகொண்டார். 

1. பல கதைகள் Take off ஆக வெகுநேரம் பிடிக்கிறதென்றும் Land ஆகி வெகு தூரம் செல்கிறதென்றும் சொன்னார்.
2. அமைப்பு ரீதியாக அனைத்து கதைகளும் ஒரு template ஐ பற்றியிருக்கிறதென்றார்.
3. முதல் கதையான அறம் கதையில் MV வெங்கட்ராம் என்ற மனிதனை கற்பனை செய்து கொள்ள வைத்ததும் தவறென்றார்.

நீங்க இப்போ வந்துரக்கர்தன்னால அதை on பண்ணல இல்லனா வந்தோனே போட்ருப்பேன் என்றார். 62 வயதில் இவ்வளவு துறுதுறுப்பான புலன் விழிப்பு நிலை கொண்ட மனிதனை எங்கேனும் நான் கண்டதில்லை.

மறுநாள் காலை walking செல்லும்போது ஒன்றாக செல்லலாம் என்று சொல்லியிருந்தார், காலை ஐந்தரை மணிக்கு whatsapp ல் இரவு சரியாக உறங்கவில்லை என்றும் அதனால் வரமுடியவில்லை என்றும் குறுஞ்செய்தி அனுப்பியிருந்தார். பின் காலை பத்தரை மணியளவில் தொலைபேசியில் அழைத்து வரமுடியவில்லை என்று வருத்தம் தெரிவித்ததோடு மாலை சந்திக்கலாம் என்றும் சொன்னார். பின்னர் சில சந்திப்புகளும் நிறைவேறவில்லை. இனியதொரு சந்திப்பாக இலக்கியம் பேச ஒரு அற்புதப் பொழுதாக அமைந்தது.

சுட்டிகள் 

1. யுவன் தமிழ் விக்கி
2. யுவன் புத்தகங்கள்