இன்றைய காந்தி

இன்றைய தினம் அக்டோபர் 2, காந்தியாரின் பிறந்த தினம்.

Courtesy: Wikipedia

  

 மகாத்மா காந்தி, தேசப்பிதா. தன்னைப்போல ஆயிரம் காந்திகளை உருவாக்கிய பிரஜாபதி. சுதந்திர போருக்கு அகிம்சை ஆயுதம் ஏந்தியவர். ஒருபோதும் வன்முறைக்கு என் 30 கோடி மக்களை இட்டுச்செல்லாதவர். சுதந்திர வேள்வியில் சிந்தவிருந்த பல்லாயிரக்கணக்கான குருதி துளிகளை தடுத்தவர். நேற்று இன்று நாளை என்று என்றென்றைக்குமான சிந்தனைகளை விட்டு சென்றவர்.இன்றைய தினம் அவர் சிலைக்கு மாலை அணிவித்து கற்பூரம் காட்டி காந்தி சாமி என்று தொன்மமாக ஆக்குவது ஒருவகை விளக்கத்தையே அளிக்கும். நேற்று நேருவிற்கு காந்தி முக்கியமாக இருந்தார். இன்று எனக்கும் முக்கியமாக இருக்கிறார். நாளை வரப்போகும் ஒருவனுக்கும் காந்தி முக்கியம்.  

21ம் நூற்றாண்டிற்கு காந்தி விழுமியங்கள் என்று சிலவற்றை சிந்தித்து பார்க்கிறேன்.

Us vs them ! 

இருபதாயிரம் ஆண்டுகளாக மனித சமுதாயம் உருவாக்கிய நாம், அவர்கள் (Us Vs Them ) என்ற கட்டமைப்பை தகர்த்தெறிந்தவர் காந்தி. என் பிடரியில் பூட்ஸ் கால்களை வைத்து முன்னூறு ஆண்டுகாலம் அமிழ்த்திக்கொண்டிருந்த அந்த பிரித்தானியனுக்காகவும் சேர்த்து சிந்தித்தவர் காந்தி. ஒவ்வொரு மேம்பாலங்கள் இந்நகரில் எழுப்படும்போதும், புஷ்பரக விமானமாக மெட்ரோ ரயில்கள் பறந்து செல்லும்போதும். அதற்கு பலி கொடுக்கப்பட்ட தொழிலார்களின் ஆன்மாவை நினைத்து பார்க்கிறேன். அதி மூர்க்கமான தற்பெருமை கொண்ட மொழி சண்டைகள், சாதி சண்டைகளில் ஒருபோதும் என் மனம் குவியாதிருக்க செய்தவர் காந்தி. இது அனைத்திற்கும் ஊற்றுக்கண் என் மொழி பெரிது என் இனம் பெரிது, உலகத்திற்கே அறிவை கடன் கொடுத்தது என் இனம் என்ற வெற்று பெருமிதங்கள். இந்த பெருமிதங்களின் இன்னொரு முகம். பிறன் என்ற கட்டமைப்பை உருவாக்கி அவர்களை தாழ்த்துவது, தூற்றுவது.

பொறுப்பான நுகர்வு 

ஒருபோதும் சலுகை இருப்பதற்காக எந்த ஒரு பண்டத்தையும் நுகர்வது தவறு என்று. ஒவ்வொரு வாரமும் நூற்றுக்கனக்கான லாரிகளில் குப்பைகள் பெங்களூரு நகரின் புறநகரில் கொண்டு குவிக்கப்படுகிறது. இன்னும் நூறாண்டுகளில் மொத்த நகரமும் வாழ்வதற்கு இடமிலாது வெறும் குப்பை மேடாகக்கூடும். அனைத்து பெரு நகரங்களிலும் இதே நிலைதான். ஒவ்வொரு பண்டத்திலும் உணவு, உடை, போக்குவரத்து, கேளிக்கை, திரைப்படங்கள் வரைக்கும் நுகர்வு புரையோடியிருக்கிறது. மானுடம் தான் செய்வது Over consumption என்ற பிரக்ஞையை இழந்து நெடுநாட்கள் ஆகிறது.

உண்மையின் பல முகங்கள் 

உண்மை என்பது எப்போதும் ஒரு முகம் கொண்டதல்ல. நான் ஒரு உண்மையை கண்டடைந்திருக்கிறேன். அதே போல் நீ கண்டடைந்த உண்மையும் அதே அளவு முக்கியமானதே என்பது காந்தியத்தின் மிக முக்கிய விழுமியம். என் உண்மை பெரிது என்று ஒருபோதும் மார் தட்டிக்கொள்ள மாட்டேன்.

மையத்திற்கு எதிரான சிந்தனை 

அன்றாடம் அலுவலகத்தில் பார்க்கும் ஒரு நிகழ்வு. எந்த தலைமை நல்லதொரு படிநிலையை கொண்டுள்ளதோ அங்கு முடிவுகள் விரைவாக எட்டப்படும் என்பது. 100 பேரை தலைமை தாங்கும் ஒருவர் அவருக்கு கீழ் சிறு குழுக்கள் அமைத்து அதற்கு தலைவர்களை நியமிக்கும்படி தான் அமைப்பு இருக்கிறது. ஆனால், முடிவுகள் அவ்வாறு எட்டப்படுவதில்லை. அனைத்திற்கும் நூற்றுவர் தலைவரின் ஒப்புதலுக்காய் காத்திருப்பது இந்த அமைப்பை குலைக்கும் செயல். இதே கட்டமைப்பு ஆட்சி அதிகாரம் அரசு என்று எங்கும் பொருந்தும்.

சிறு வயதில் இருந்து காந்தியின் மீது கொண்ட பொய்யான சித்திரத்தை மாற்ற எனக்கு உதவிய புத்தகங்கள்.

1. உரையாடும் காந்தி - ஜெயமோகன். காந்தி குறித்தது  வாசகர் கடிதங்களின் பதில்கள், கட்டுரைகளின் தொகுப்பு 

2. காந்தியின் நிழலில் - S ராமகிருஷ்ணன். 

3. நாளைய காந்தி - சுனில் கிருஷ்ணன்